Шматгадовая шызавата-зялёная травяністая расліна з паўзучым карэнішчам. Сцёблы вышынёй 15-40 см, прамыя, трохгранныя. Лісце двухскладкаватае, карацейшае за сцябло, у ніжняй частцы сцябла — чырвона-бурае, лускападобнае. Ніжні крыючы ліст суквецця карацейшы за суквецце або роўны яму. Суквецце з 1-2 верхавінкавых мужчынскіх каласкоў і 2-4 жаночых. 3 рыльцы. Размнажэнне насеннае і вегетатыўнае.
Барэальны атлантычна-еўрапейскі рэліктавы від. Пашырэнне: Скандынавія, Сярэдняя і Атлантычная Еўропа, Паўночная Амерыка і Новая Зеландыя. У Беларусі знаходзіцца ў асобных лакалітэтах за паўднёва-ўсходняй мяжой суцэльнага арэала. Месцы росту: сырыя забалочаныя лугі на карбанатных глебах. Расце невялікімі групамі.
